هل القطط تسبب العقم او خطر علي البنات 🎀
هل القطط بتسبب عقم للبنات ؟؟
اي حد يربي قطة يأتي في خاطره هذه الاسئلة
وانا جي النهاردة عشان اطمنك واعرفك شوية حاجات عن المرض اللي بيسموه مرض القطط او داء المقوسات
اولا️ لازم تعرف ان مرض القطط مصاب بيه حوالي ٦٠ % من البشر وغير ظاهر عليهم الاعراض ، وبالتالي فهو مرض انتهازي يعني متواجد معانا بس بينتهز فرصة ضعف مناعي
️ طب هوا مرض القطط بييجي من القطط ولا من حاجة تانية غير القطط ؟؟
مرض القطط بيتنقل في معظم الحالات من اللحوم الغير جيدة الطهي ، زي اللحوم النص سوا و اللحوم المشوية وبعض اللحوم المصنعة زي البسطرمة والبرجر واللانشون والسوسيس
طيب معني كدة ان اي حد بياكل لحمة مشوية يتصاب بالمرض ؟
لا طبعا ، لان لازم ٣ عوامل عشان الشخص يتصاب بالمرض
أولا : لازم اللحمة تكون تحمل مرض داء المقوسات
ثانيا : لازم الشخص اللي هياكلها يكون اتصاب بالمرض قبل كدة ، يعني يكون ده تاني تعرض ليه للاصابة
ثالثا : لازم تصادف مناعة ضعيفة جدا زي مرضي الايدز او كبار السن ، او تصادف عامل من عوامل الاجهاد الشديد زي الحمل
فبنأكد ان مرض القطط عشان الشخص يحصله منه اصابة لازم يتصاب مرتين بيه ، وتكون مناعته في وقت الاصابة التانية ضعيفة يعني زي شخص مسن او امرأة حامل
طيب ليه سموه مرض القط ؟؟
لان القطط عاملة زي عامل مشترك في المرض ده ، يعني المرض يلف يلف دورته و ينتهي عند القطط
لكن القطط مش هما المتهم الرئيسي في اصابة الانسان ، بدليل معظم اللي بيتصابوا بالمرض مش بيربوا قطط من الاساس ولا بيحبوها ، وده حقيقي
ازاي احمي قطتي من داء المقوسات ؟؟
عن طريق عدم تقديم لحوم نيئة او نصف سوا للقطة
وعدم خروج القطة برة المنزل
وتجنب اختلاط القطط بقطط اخري
طيب هل المرأة الحامل ماتتعاملش مع القطة ؟
لا طبعا تتعامل عادي
لكن ينصح انها ما تتعاملش في تنظيف فضلات القطة يعني تبعد عن الليتر بوكس بتاع القطة خالص
طيب هل يوجد تطعيم لقطتي من المرض ده ؟؟
مفيش تطعيم للمرض ده حتي الان ، لكن ممكن ندي علاج للمرض وقائيا تحسبا ان القطة تكون مصابة
لكن ممكن تعالج وقائيا ، يعني بتفترض انها مصابة بالمرض وتاخد كورس علاجها كامل بعلاج الكلينداميد البيطري
هل لو عندي بنات الافضل ما اربيش قطط ؟؟
لو عندك بنات تربي قطط عادي جد
اوحتي الحوامل منها
لكن الاولي لو خايفين علي البنات خلو بالكم من اللحوم المصنعة ، زي اللانشون والبسطرمة و البيفي والسوسيس والهامبرجر لانها المسبب الاكثر شيوعا للمرض
فاطمنوا وربنا يحفظكم جميعا
ربوا قطط واتطمنوا ماتخافوش ، القطط لن تسبب لكم العقم
كتبه ، طبيب بيطري / أسامة مقلد
